مقال لمن يريد الصيد بمدينة الداخلة

السلام عليكم .. اليوم جيتكم بموضوع غادي يعجبكم و الأغلبية فيكم باغي يقراه وعندو تساؤلات فيه
#الداخلة أو رحلة صيد في الداخلةالداخلة مدينة شبه جزيرة عندها جوج بحور المحيط الأطلسي على اليمين و خليج واد الذهب على اليسار
المحيط الأطلسي : شواطئ المحيط الجانبية للداخلة شديدة التخريب بحيث أنه جميع انواع الصيد مباحة فيه الشباك الشنابريا الفلايك الباركوات ... دون حسيب ولا رقيب على التجاوزات لهذا كايبقاو المصايد القريبة للمدينة غير صالحة للصيد بالقصبة بنسبة 90%
خليج واد الذهب : تعين هاد الخليج سنة 2004 كمحمية و تمنع فيه

الصيد بالقوارب رغم بعض التجاوزات اللي كانت سير التنفيد حتى للزيارة الأخيرة للملك محمد السادس نصره الله الي عطا القرار ديال تنظيف شاااامل للخليج من المخربين أصحاب الشباك... لهذا كايبقا الخليج أفضل لممارسة الصيد بالقصبة ولكن دائما خارج المدينة.
الداخلة .. أغلبية الرياس كايتمناو يصيدو فيها وكلشي كايقول انمشي للداخلة لكن الحال صعيب و البعد زاد صعبو
انعطيكم فكرة و بالأرقام إن شاء الله باش ماتبقبقاوش غالطين و معمرين روسكم بالأفكار المتداولة حتى تصدقو مصيدين و مصدومين من الواقع
الداخلة كايقولو عليها جنة الرياس .. أنا كانقول لا فقط منطقة مزال فيها شويا دالخير و الحمد لله
الداخلة بغات القوام كيف كايقولو (قوم ولا طلق) ويلا ماكنتيش محترف غادي يصعاب عليك تصيد فيها الحوت حيت لاحضت بزاف صحاب الكريتيك الخاوي كايقولو فالتعاليق نتا راك فالداخلة أجي عندنا و صيد الحوت الصراحة ماعمرني جاوبت شي واحد ولكن دبا عندي جواب مماثل للتعليق أنا بدوري ادعوك للداخلة وصيد الحوت 😉 المهم ندوزو للمعقول :)

1 - النقل : أ - النقل بالطائرة : الطائرة 1000 درهم من الدار البيضاء و 800 درهم من أگادير و كايبقا خاسك وسيلة باش تنقل بين المصايد هنا فالداخلة وهاديك الخدمة كاين ناس فالداخلة كايقدموها و بأثمنة متنوعة إبتدأ من 800 درهم تقريبا ماعنديش فكرة شاملة تال 1300 درهم لليوم الواحد حسب الخدمات المقدمة و حسب الإتفاق الأول بينكما
ب - النقل بالسيارة : وداكشي راجع ليك نتا و فاش كاترتاح السيارة مثلا من الدار البيضاء 2000 كلم تقريبا خاسك ليها نهار كامل تقريبا غير باش ترتاح نسبيا فالداخلة لمتاعب الطريق و طولها ولكن لازم سيارة دفع رباعي وإلا غادي تشبع فقصة و ترجع بحالك و يبقالك المشكل دالرملة فالطرقات للمصايد معقدك فالرحلة ديالك

2 - السكن و الإرشاد : كيفما قلت من قبل كل واحد والظروف اللي عندو وكل حاجة عندها علاقة بالأخرى يعني البرنامج ديالك إلا كان مخصوص من شي جهة راك غاتكرفس راه الصحراء هادي .. كاين ناس كايقدمو هاد الخدمات وداكشي حسب الأختيار ديالك وبأثمنة مختلفة كيفما ذكرت من قبل واش تسكن فالدار فالداخلة و تبقى تمشي للمصايد كل صباح و ترجع فالعشية 200 كلم كأدنى مسافة ولا تسكن فوق المصيد فخيمة و تبات على إقاعات الأمواج وتصبح فالطبيعة العذراء مشحط مع الفجر كاتبان ليا مشوق تمشي للداخلة صبر صبر زيد قرا 😃

3 - المصايد و المنزلات : صفي نيتك أ صديقي وراه ربي مغاديش يخيبك :)ولكن ضروري من خبير المصايد أصاحبي فالداخلة حيت الحوت فعلا قل والمصايد المزيانين خاسهم ولد البلاد وهادشي فعلا كايدخل فخدمة الإرشاد وضروري تحسب 1000 حسبة و تختار الوقت المناسب للرحلة أو حاول تكلف شي محترف يختارليك الوقت المناسب حيت المسألة مساهلاش باش أنك تخسر 7000 درهم أو أكثر أو حتى أقل و ماتصيدش الحوت راه قااااااااسحة هههه أنا شخصيا رغم انني كبرت فالداخلة منذ نعومة الأظافر و ساكن فالداخلة سنين هادي إلا أنني مؤخرا خسرت و عاود خسرت بالرحلات ديالي للداخلة بحكم ان العمل عندي فأگادير لكن الحمد لله الراس عمر و خدينا تجارب من ذهب واللي غانشاركها معاكم ديما (كلشي ديال الله) :) :)

4 - الرفقة : أهم شئ من هادشي كااااااامل هو الرفقة حذاري ثم حذاري راه اللهم تخسر 10.000 درهم بوحدك ولا تجيب معاك اللي يخصرليك الخرجة #إختر_الرفيق_قبل_الطريق راه الداخلة هادي راه الصحراء هادي الشريف والله مايقدر عليها غي الرجال كانقولها ونعاودها غير الطريق تبينليك شلاااا عيوب من شتا النواحي كون متوقع كلشي وماتنساش التوثيق راه هو اللي كايبقا من هادشي كامل..

5 - الحوت : في حالة ما صيدتي الحوت و بغيتي تديه معاك راه ممكن غير سول على راسك الحوت ديال الداخلة راه وصل لفاس - تازة - الراشيدية - طنجة ... خاس غير المحترف هو اللي يتكلف ليك بالتلفيف :) وكاين اللي كايفضل يبيعو باش ينقص مصاريف الرحلة والثمن كايتعطا حسب الجودة اللي وصلتي بيها السمكة للسوق ولكن ماتعولش على الحوت وتدخلو فالحساب ديالك دالرحلة ديرو غير خضرة فوق طعام كيفما كايقولو

ندوزو دبا لجيهت المطريال 😉
المطريال : وايييييه هههه المهم گاع ماتكتر على راسك بزاف بالنسبة للقصب 2 قصبات كافين و إلا كان عزيز عليك السبينينغ و الخفة مافيها باس تزيد معاهم قصبة صغيرة مع الطعوم الصناعية ديالها ..

السورفكاستينغ : فنظري قصبة 4.20 كافية ولكن شوف نتا عاوتاني فاش كاترتاح ربما 5 أو 6 متر شغلك هداك .. البلوم گرابان ضروري جيبو معاك ولا أحسن تجي تالداخلة وشريه راه غير 5-6 دراهم والصنانر وداكشي بلا مانهضر عليهم حيت إلا جيتي بلا بيهم غير ضور تا تشبع ضوران و شري الحوت من المارشي و رجع لدارك 😃 فالداخلة المونطاجات و داكشي حاول تستعمل الصح و الغلض شويا داكشي الرقيق يتقطع ليك بسهولة هنا مع اول سمكة حيت أغلبية المصايد اللي فيهم الحوت قاسحين شويا و أكيد أن كلشي كايتمنا يصيد سمكة القرب (كوربين) من الحجم الكبير كانقوليكم راه ماشي صعيب تصيدها ولكن اللي صعيب هو تلقاها فين سارحة حيت القرب سمك حساس و كايشم رائحة دم خوه ودغيا كايهرب من المصائد المخربة.
الطعوم : عندك (اللونغ - السيبيا - كلمار - السردين - العقريش) هاد الطعوم مجودة فالداخلة و بأثمنة جد مناسبة .. الباقي جيبو معاك 😉
السبينينغ : ضروري يكون عندك البيلدو و الراغلوات والربالات حيت كاين مصايد ديال أبلاغ والبونيطو ... و السكور ثم السكور هادشي إلا كنتي كادير سبينينغ ماكنتيش بلاش

أولاح : جيتي للداخلة ضروري خاسك تصيد أولاح ما عدا إلا مكانش فالرزق الطعوم الصناعية الخاصة به كاتباع هنا فالداخلة 75 درهم ذات صنع محلي كما انه يمكنليك تجيب معاك طعوم صناعية أخرى نتا و إختيارك .. بتعاون مع صفحة #تقنيات_الصيد_بالقصبة والأدمن ديالها السيد محمد العاشوري Med Elach صورنا هاد الفيديو https://youtu.be/oebkgeu9JYQ بأقل الإمكانيات باش نحاولو نوصلو للناس نبذة كيفاش كايتصيد هاد الوحش وهذا فيديو أخر مرافق : https://youtu.be/JDYC0EUw-Ms

البيلوطة : المصايد ديالها قلال فالداخلة وبعاد 180 كلم 230 كلم ... أنا شخصيا كانخدم بهاد التقنية ولكن دخلت فيها بعض التعديلا اللي وضحتها فهاد الفيديو : https://www.youtube.com/watch?v=sE6uHXIcAw4

كثيييير مايتقال والمواقف كثيرة و أنا شفت الكثير من الأصدقاء ديالي و المشاكل اللي و قعو فيها لهذا كانكتب هاد الموضوع لعل و عسى يتفاداوها المقبلين على الرحلة غير هو اللي نوصي عليه هو سول على راسك مزيان و قرر و موت فالقرار ديالك راه التغييرات فالبرنامج تؤدي إلا ال
ويلا حسبتي 5000 درهم مثلا كمصاريف الرحلة زيدها 1000 درهم سوكور ماتعرف الوقت أش تجيب

تهلكة وراه باشما تقامت عليك الرحلة الأولى رخيسة حيت غاتكون بمثابة تجربة عظيمة وماتبقاش تعمر راسك بالكلام ديال المبالغين فالتعاويد راك غاتصدم في الأخير الحوت راه ماشي ساهل تصيدو لا فالداخلة ولا شي منطقة أخرى وتوكل على الله وتمنى الخير دائما

المقال منقول من صفحة الاخ وليد جزاه الله خيرا.

صفحة الاخ وليد

شارك المقال

شاركه على فيسبوكشاركه على جوجل+